食檸檬(何嘉明傳道)

何嘉明傳道623日晚的証道文字檔案。再次感謝小明到來本堂牧養,願主賜福。

2016.6.23
經文:路加福音十四15-24
講題:食檸檬

15同席的有一人聽見這話,就對耶穌說:「在上帝國裏吃飯的有福了!」16耶穌對他說:「有一人擺設大筵席,請了許多客。17到了坐席的時候,打發僕人去對所請的人說:『請來吧!樣樣都齊備了。』18眾人一口同音地推辭。頭一個說:『我買了一塊地,必須去看看。請你准我辭了。』19又有一個說:『我買了五對牛,要去試一試。請你准我辭了。』20又有一個說:『我才娶了妻,所以不能去。』21那僕人回來,把這事都告訴了主人。家主就動怒,對僕人說:『快出去,到城裏大街小巷,領那貧窮的、殘廢的、瞎眼的、瘸腿的來。』22僕人說:『主啊,你所吩咐的已經辦了,還有空座。』23主人對僕人說:『你出去到路上和籬笆那裏,勉強人進來,坐滿我的屋子。24我告訴你們,先前所請的人沒有一個得嘗我的筵席。』」

耶穌去飯局,興高采烈之際,有人對佢話:「在神國裏吃飯的有福了!」但耶穌好似潑佢冷水咁,講一個關於食檸檬的比喻:有人大排筵席,但18眾人一口同音地推辭,即佢地所有人,由頭一個開始,一一推辭,所有賓客,早唔講,就係叫埋位時,先至突然異口同聲話來唔到!如果俾你係主人,你有咩感受?中東貴族宴客的傳統係:主人在發帖時已預人數:劏雞 定宰羊 還是人多到要殺隻牛,有一百人來飲,就煮夠一百人食的肉,宰殺的動物當晚要食晒,冇雪櫃,冇得留,所以第一次冇話唔來的賓客,係有責任出席。你班人夾埋來玩我?

咁唔俾面嘅賓客,請人食檸檬仲大條道理,聽落都係人生大事:買地係大投資,地係中東人重要產業;買牛喺古近東的農村即係擴展生意、 娶老婆成家立室咁緊要,唔去飲一餐半餐有幾閒?

1. 第一舊檸檬好巴閉:係地主檸檬,買地要去睇吓,來唔到飲,第十八節「買了」,塊地已經買咗,地契簽埋,仲去睇咩呢?當時地契不止列明塊地幾大、咩範圍,仲列埋附近有幾多個水泉、幾多口井、幾多棵樹、有冇小徑、連預計雨量,塊地的歷史、預計可帶來多少利潤,買家一般都好清楚,因土地對中東人係好珍貴,地已經買了,仲要去實地睇啲乜嘢?而且黃昏開席,你係要入黑至來睇地?

地主個檸檬相當惡鯁,咁嘅理由非常無禮,預咗同主人家關係擘面,講出來喺當時係無人信,個個明知你講大話,你仲講?咪特登囉!佢特登講個無人會信的甩底理由,落主人面。

2. 第二個牛牛檸檬,十九節『我買了五對牛,要去試一試。一買買十隻,係大交易,但呢個甩底理由,一聽亦知係大話,因為耶穌時代中東村落賣牛有兩種做法:

a) 一種,牛主拖一對牛去市集,喺邊位即場劃出一忽做小田地,買家可即場試吓拉吓呢對牛合唔合拍,如果步伐不一致就不買。

b) 另一種,唔駛拉牛出市集,牛主同街坊講定邊日賣牛,啲人就會喺指定日子去牛主塊田,睇牛主示範拉牛,亦可以試吓操作,兩隻牛聽唔聽佢駛、拉力是否平均,係咪能夠同負一軛。所以買牛前一定試牛,正如如果有人買十部二手車,俾晒錢,但試都冇試過啲車?

3. 第三個係愛的大檸檬:20又有一個說:我才娶了妻,所以不能去。係咪同餐喜酒撞期吖,咁冇法喎,新郎一定要飲自己嗰餐。但村內有咩大事或喜慶,一定請晒全村人,唔會揀埋同一日。而且老婆唔係今日娶,係已娶咗。更致命嘅係,古時中東,女人地位好低,男人喺正式場合,係唔會談論女人包括自己老婆,新婚男撻老婆做甩底理由,即係向筵席主人話:雖然我之前應承來飲,但今日突然我同我女人有約,擺明在我眼中,主人家嘅地位仲低過女人,相當剃眼眉。新婚男比前面兩人更冇禮,佢比前兩人講少咗一句:請你准我辭了。佢連推辭的請求都慳番。

喺阿拉伯一啲部落,臨時至托辭甩底,係等同向主人家宣戰。

突然硬鯁咁多個檸檬,冇人來飲,俾你係主人家,係咪取消大筵席?主人家知呢班人嘅意圖,如取消,啲賓客就會唱佢:冇咗我地,你根本擺唔成酒,廿一節,主人家嬲,但吩咐僕人:快出去,到城裏大街小巷,領那貧窮的、殘廢的、瞎眼的、瘸腿的來。佢唔係發晦氣,亂up,呢幾種人同俾檸檬佢食嗰班人,有咩對應之處?窮人唔會有人請佢飲、當時社會殘疾的人被視為不完整、不潔淨、梗係犯咗大罪被神懲罰,所以殘疾好難娶到老婆、殘疾唔係包括埋瞎子同瘸腿的?耶穌特登重複,因為瞎子用來對應話要去睇吓塊地嗰個地產專家,盲嘅點會唔去睇地?瘸腿的用來對應阿牛專家:瘸腿嘅,點試牛呢?

原本的賓客自覺高尚,配得主人宴請,仲選擇唔去添,主人於是轉為請呢個城內被人嫌棄、冇能力、被視為不配的人。但仲有位剩,主人再徹底啲,23主人對僕人說:『你出去到路上和籬笆那裏,勉強人進來,坐滿我的屋子 。路上係指大路,即係城的邊緣,連城外的人都帶來飲,籬笆 係乞丐可以找到藏身之所的圍欄,乞衣都請來。

貧窮的、殘廢的、瞎眼的、瘸腿的、邊緣人、流浪漢、異鄉人主人家睇中呢啲人乜嘢?主人家同呢幾種人有一個共同點:喪食檸檬!咁尊貴的主人家可能人生無幾多次,咁樣樣被人塞佢食檸檬,但班貧窮的、殘廢的、瞎眼的、瘸腿的、邊緣人、流浪漢、異鄉人呢?佢地食檸檬就家常便飯,世代貧窮,一出世就注定被人拒絕。

所以佢地發夢都冇諗到,會獲得貴族主人的宴請,但即使佢捱緊餓,好想去食呢一餐,都唔可以即刻入席,基於傳統文化的禮儀,佢地同主人家的社會地位太懸殊,佢地係一定要拒絕,主人家就估到佢地的反應,所以23節吩咐僕人:「 勉強人進來,坐滿我的屋子」,這「勉強」,不是強逼人,因為根據當時的文化禮儀,那些超低下階層,頭十五分鐘必須係咁拒絕,以示識禮儀,所以僕人要一路落咀頭,溫柔咁拉住佢隻手入屋,等佢見到成桌美食坐低為止。

試代入一個成世食檸檬、被人拒絕慣嘅人的心路歷程:我同呢位尊貴的主人無親無故,我甚至唔係呢個城嘅人,我呢世都無嘢可報答佢,佢請我飲?冇可能係真嘅?!所以按禮、按理,我都必須拒絕。但佢個僕人笑住咁,一路叫我,輕輕拉住我嘅手入座,佢勉強我入去,係享受愛筵,我咁不配,竟然有人當我上賓款待,我人生第一次感到完全被接納,點形容?恩典,只能用呢兩個字,因為唔係我賺到、搏到返來,係白白俾我,俾我呢個毫冇能力會回報佢嘅人。呢位飽嚐檸檬、被人拒絕、尊貴的主人家,竟然同我地呢啲咁卑微的人認同,過去所食的檸檬,忽然好似由酸變甜咁神奇。

如果耶穌係個主家,你覺得自己係邊種賓客?係食慣檸檬嘅邊緣冇權者、定係最早被請飲、自以為上賓俾檸檬耶穌食嘅人?咁多年來,你有冇以各種藉口去推耶穌?主,如果我搞掂乜乜乜,我就為你乜乜乜?耶穌,到我讀完乜書,我就認真追求信仰;神呀,如果你俾我建立番啲事業,有啲成績,我就全心事奉你;上主,如果你俾我梳理好啲感情瓜葛,你點話點好啦。我地總有無數自己的大計,排得先過回應神。

我重複問你:如果耶穌係個主家,你覺得自己係邊種賓客?其實你可以兩種都係,曾幾何時,你都係嗰啲貧窮的、殘廢的、瞎眼的、瘸腿的、邊緣人、流浪漢、異鄉人,曾幾何時,你感到被群體排拒、不被接納,當你遇見耶穌,佢當你上賓款待擁抱時,你深感不配。但你的生命有冇全然歸俾呢位主?如果你真係不再逃避,你夠膽去回應佢,你要預咗你要好似一個玉瓶俾佢打爛粉碎,你要捨棄你依戀嘅你嗰種生命,俾佢按圓按扁、陶造、重建,而且走佢嘅路係要忠心至死!